مشاكل ضبط اشارة الرسيفر والطبق

مشاكل ضبط اشارة الرسيفر والطبق

مشاكل ضبط اشارة الرسيفر والطبق
عـنـــدك رسيفــــر فى الـبيـــت؟
ومين ماعندوش!!!!
سواء كان عندك رسيفر مع طبق ثابت على النايل سات وده شىء اساسى
او تركيبه ثابته فيها اكتر من قمر , وده منتشر جداا
او منظومة طبق متحرك وبرضه منتشرة بشكل مش قليل
فالبوست ده مهم جدا ليك....
و لازم بدون نقاش تكون ملم وفاهم بشكل كامل لمعنى الاشارات فى الرسيفر ومدلول كل مؤشر في مؤشرات الاشارة المعروضه على الشاشه
ـــــــــــــــــــــــــــــــــــــــــــــــــــــــــــــــــــــــــ

أوقات كتير تبقى إشارة القناة او التردد صفر ومهما حاولت تضبط إشارة الطبق مش هتعرف لان المشكلة مش فى الاشارة نهائيا انما المشكلة فى التوصيلات فقط
أوقات كتير تبقى الاشارة صفر وتضيع وقت ومجهود فى التوصيلات والسلوك والكونكتور وبرمجة الرسيفر وتنزيل سوفت وير وتروح بالرسيفر لفنى والمشكله فى الطبق فقط
اوقات كتير تبقى الاشارة عندك ضعيفه والقناه بتكسر ومش فاهم ايه الحل
بعد فهم الـ3 صور اللى فى البوست هتقدر تعرف فى ثانيه واحده ايه المشكله , وايه سببها , وايه حلها
طبعا كتير اوى مننا الموضوع ده معروف ليهم من اول يوم ليهم فى التعامل مع الرسيفر
ـــــــــــــــــــــــــــــــــــــــــــــــــــــــــــــــــــــــــ
قراءة الاشارة فى اى رسيفر بتعتمد على مؤشرين مهمين:-الاول: القوة , او الاشارة ويرمز له بحرف S

وبيكون فى رسيفرات كتير إختصار لكلمة Strength بمعنى قوة
وفى اجهزة اخرى اختصار لكمة SIGNAL بمعنى اشارة
وفى النهايه الاتنين نفس الغرض ونفس الهدفالموشر التانى اسمه الجودة ويرمز له بحرف Q

وده اخصار لكلمة quality يعنى جودة الاشاره
ـــــــــــــــــــــــــــــــــــــــــــــــــــــــــــــــــــــــــ
معيار الاشارة اللى بيرمز له بحرف S له تعريف دقيق ومفصل هنختصر كل ده ونقول انه المؤشر على :سلامة تيونر الجهاز
سلامة السلك
سلامة الدايزك ان وجد
سلامة التوصيلات
سلامة العدسة
سلامة جميع التوصيلات كامله
صحة اعدادات القمر
اى عطل فى كل ماسبق هتلاقى الاشاره صفر وفى بعض الاجهزة لا تتعدى 20% وفى الطبيعى بتكون فوق %90
حتى لو مش مستقبلين قناه او قمر؟؟؟
نعم حتى لو مش مستقبلين قناه او القمر كله
حتى لو كمان مش مركب العدسه على طبق من الاساس
بمجرد انك تكون عامل الاعدادات فى الرسيفر على KU باند ونوع اللاقط على عالمى أو يونيفرسال و الفولت على 13/18 و واقف على اى تردد
هتلاقى اشارة S فوق 90% وربما اكتر قليلا او اقل قليلا
وده معناه ان التوصيلات والاعدادات كلها سليمه تماما والمنظومه عندك متوقفه فقط على توجيه الطبق بشكل سليم الى القمر واستقبال الاشاره
ـــــــــــــــــــــــــــــــــــــــــــــــــــــــــــــــــــــــــ

بعد ما فهمنا الجزء الفنى نروح لأخر واهم جزء

قراءة وفهم الأشاره اتقى الصورة رقم 1

لو الأشاره كانت شغاله عندك والأمور مستقرة وفجاه لقيت مؤشر Q صفر
مؤشر S فوق 90%
يبقى بشكل قاطع:-
1- التوصيلات سليمه ما فيهاش اى مشكله
2- المشكلة فى إشارة التردد عندك وسببه اما التردد نفسه فصل من المصدر او الطبق اتحرك من مكانه او العدسة تحركت من مكانها
والحل؟ لو إشارة جميع الترددات على نفس القمر زي ما هى بدون مشكلة يبقى التردد ده فقط فيه مشكلة من المصدر ومش محتاج تعمل اى حاجه
لو جميع ترددات القمر اختفت او ضعفت بشكل كبير يبقى طبقك محتاج ضبط سواء فى الطبق نفسه او العدسه
التوصيلات سليمه ومش محتاج تتأكد منها نهائيا
ــــــــــــــــــــــــــــــــــــــــــــــــــــــــــــــــــــــــــــــ

الصورة رقم 2مؤشر Q على رقم صفر

مؤشر S على رقم صفر او رقم قليل جدا عن المعتاد
يبقى بشكل قاطعا لمشكله عندك مش فى التردد ولا إشارة القمر
المشكلة عندك فى التوصيلات فقط طالما لم تغير اى شيء فى اعدادات الرسيفر
الحل:-لازم تتأكد من التوصيلات كلها من اول الكونكتور الواصل بالرسيفر ثم السلك ثم الكونكتور الواصل بالعدسة ثم العدسة نفسها , والدايزك ان وجود
مستحيل الاشارة ترجع معاك الا لو حليت مشكلة التوصيلات
بمجرد حل المشكله فى التوصيلات الاشاره هترجع بشكل تلقائى
ـــــــــــــــــــــــــــــــــــــــــــــــــــــــــــــــــــــــــــ

الصورة رقم 3مؤشر Q فوق 90%

مؤشر S فوق 90%
ده معناه ان كل شيء سليم ومفيش اى مشكله نهائيا سواء فى التوصيلات او إشارة التردد
طبعا كل ما زادت الرقم فى Q و S يكون افضل
التغير فى مؤشر S بيكون بسيط جدا والاهم هو مؤشر Q يكون على اعلى رقم ممكن
كل ما مؤشر Q زاد معناه ان الاشاره والضبط فى افضل وضع ليهم
كل ما مؤشر S زاد معناه ان التوصيلات وجودتها فى افضل حال ليهم
جودة التوصيلات سواء سلوك او دايزك او عدسه او كونكتور بيكون ليهم عامل كبير جدا فى قوة الاشارة Q وزيادتها بلاشك
فأحرص دايما انك تختار اداوت استقبال جيدة الجوده سواء اسلاك او عدسات وغيرهما
ــــــــــــــــــــــــــــــــــــــــــــــــــــــــــــــــــــــــــــــــ
اخيرا وبكل اختصار ....لو Q=0 و S=90% يبقى مشكلة ضبط طبق وتردد
لو S=0 يبقى مشكلة توصيلات لازم حلها
الأرقام قد تختلف من جهاز لأخر ومن معالج لأخر فلازم نفهم جهازنا قراءاته ايه
التدوينة منقولة من الفيس بك المصدر