 |
| شرح خاصيه DLNA لربط التليفون بالرسيفر |
شرح خاصيه DLNA لربط التليفون بالرسيفر
منقول
بسم الله الرحمن الرحيم
السلام عليكم ورحمة الله وبركاته
DLAN إختصار ل
Digital Living Network Alliance
و ده عبارة عن اتحاد مجموعة شركات على رأسها شركة Intel الشهيرة فى مجال الكمبيوتر والمعالجات تحديداً.. اجتمعوا سنة ٢٠٠٣ عشان يشتغلوا على تقنية يكون استخدامها سهل لمشاركة الوسائط ( ڤيديوهات .. صور .. موسيقى) بين الأجهزة
والمشاركة هنا مش بفكرة ال share it اللى بتبعت فيه ملف من جهاز لجهاز. . دى مشاركة حية زى مراية كده.. فى حالتنا مثلاً تعرض فيديو أو صورة أو أغنية من موبايلك على الشاشة عن طريق ان الموبايل والرسيفر يكونوا على نفس شبكة الواى فاى
اقولك انا أستخدم ٣ تطبيقات فى القصة دى .. جربهم واختار اللى يريحك فيهم
١ - التطبيق الأول.. XCAST
بتنزله من هنا
تدوس من ريموت الريسيڤر زرار source أو تدخل على الوسائط المتعددة Multimedia وتختار DLNA وبعدين DMR
أو هتلاقيها داخل قائمة apps فى الأجهزة الجديدة
بعد كده بتروح لموبايلك وتفتح البرنامج هتلاقيه لوحده بيعمل بحث عن الأجهزة اللى ممكن يتصل بيها ويظهرك الرسيفر بإسم Sunplus xxx .. بمجرد ما تختاره هتلاقى شاشة التليفزيون قلبت على لوجو البرنامج و موبايلك اتقسم فولدرات تختار منها اللى انت عايز تعرضه على الشاشة.
٢ - التطبيق التانى .. Bubble
بتنزله من هنا
تدوس من ريموت الريسيڤر زرار source أو تدخل على الوسائط المتعددة Multimedia و تختار DLNA و بعدين DMR
أو هتلاقيها داخل قائمة apps فى الأجهزة الجديدة
بعد كده بتروح لموبايلك و تفتح البرنامج هتلاقى علامة شاشة فيها واى فاى هتدوس عليها و تختار برضه Sunplus xxx .. و بعدين على شمال البرنامج تحت هتلاقى كلمة more تدوس عليها و هتلاقى تقسيمة ملفاتك فى الموبايل تختار منها اللى عايز تعرضه و لو قالك عايز تضيفه لل playlist دوس ok و روح ل playlist تحت فى القائمة جنب more و اختار الملف هيظهرلك على الشاشة.
٣ - التطبيق التالت .. Tubio
بتنزله من هنا
تدوس من ريموت الريسيڤر زرار source أو تدخل على الوسائط المتعددة Multimedia و تختار DLNA و بعدين DMR
أو هتلاقيها داخل قائمة apps فى الأجهزة الجديدة
بعد كده بتروح لموبايلك وتفتح البرنامج تلاقيه لوحده بيعمل بحث عن الأجهزة اللى ممكن يتصل بيها و يظهر لك الريسيفر باسم Sunplus xxx .. بمجرد ما تختاره تلاقى تقسيمة ملفاتك فى الموبايل بشكل حلو .. تختار منها اللى عايز تعرضه و يظهرك على الشاشة.
✔ بالنسبة لأجهزة Apple
نزل برنامج iMediaShare من هنا
أو برنامج Tubio من هنا
👈 فيه حتة حلوة كده ممكن تكون الناس مش عارفاها
لو عايز تشغل من ابليكشن اليوتيوب نفسه على الريسيڤر .. بتشارك الفيديو ( Share )
هيجيبلك البرامج اللى ممكن تشير منها زي الفيس بوك و كده.. ساعتها اختار برنامج ال DLNA اللى تستخدمه و تلاقى الفيديو اشتغل معاك على الرسيفر 😉 👍
الميزة هنا التحكم السهل من الموبايل عكس الرسيفر وكمان مش لازم تفضل فاتح اليوتيوب على موبايلك عشان يفضل شغال على الشاشة.. لأ عادى استمتع وعيش حياتك براحتك على الموبايل وكده كده الفيديو شغال معاك على شاشتك 👌
👈 حاولت أكون بسيط فى الشرح و يارب اكون وُفقت والمعلومة وصلت بسهولة 💛